جاني صاحبي بيعاتبني
قالّي مُش هَتعزي فيها
قلتلو.. مين اللي ماتت؟
قالّي أحلي شيء ف عمرك
وف حياتي وف حياتك
قلتلو مين اللي ماتت!
قالّي لسّه مُش عارفها!!
دانت عايش في نعيمها وفي عذابها
وإنت دايب في حروفها وفي زمانها
داحنا من خُدَّامها يا بني
من هنا وضحلي قصده
وابتديت آخد بيدّه
بسّ برضه
قلتلو مُش دي اللي ماتت
مين يقول الكلمة تفني..
أو تموت ف قلوب شريفة
لا يا صاحبي.. الكلمة عايشة
بسّ هِرْبتْ من حياتنا
أيوه هربت من حياتنا
لمّا تبقي الكلمة شايفة
النَّاس بتفخر بالخيانة
وامَا تبقي الكلمة شاهدة
الذوق بيهرب م الحنايا
وامَا نخلف في وعودها
ولاَ نحرق في عهودها
لمَا تتجمَّع سيوفنا ف يوم عليها
ونطاردها ف كلِّ محفل ونعاديها
لمّا بنبدِّل حروفها
ولاّ نسخر من جمالها
لمّا نار الحقد تحتل المدينة
وامّا أمّك ولاّ أمِّي تموت حزينة
ليه هَتُصْبُر ع اللي فينا!
ليه هَتبِقَي ف يوم علينا!
ليه نبيعها وتشترينا!
لا ياصاحبي.. الكلمة عايشة
بسّ هربت من حياتنا
أيوه هربت من حياتنا
بسّ عارف إمته هربت من حياتنا
لمَا صدق الحب هاجر من قلوبنا
والمعاني الحلوه غرقت باختيارنا
كان ضروري يكون طريقها
غير طريقنا
لما هجرتنا البلابل
وارتضينا البوم يغنّي ف المحافل
كان ضروري يكون طريقها
غير طريقنا
قل بصدقك يا صديقي
وإنت حلمي ونور يقيني
هية لمَا الدُّنيا ع المظلوم بتقسي
وأمَا تبقي لكل جاني بيت ومرسي
تفتكر.. الكلمة ترضي تعيش مابنا
تفتكر.. تفضل تدوق النار
ونار البغض منا
ليه هتصبر ع اللي فينا!
ليه هتبقي ف يوم علينا!
ليه نبيعها وتشترينا!
كان ضروري يكون طريقها
غير طريقنا
شوف يا صاحبي
لو عايزني أقبل تعازي أو أعزي
يلا بينا
كل يوم بتموت قلوبنا
والسَّبب منَّا وفينا
ألف آه من كل قلبي
ألف آه من كل قلبي
والدوام لله يا صاحبي
الدوام لله
موضوع: شوف يا صاحبي 
2008-08-17, 1:53 pm
