كتبت لك جواب يا ريس ورجعت قطعته
وفكرت ميت مره أجازف وأروح باعته
باشكيلك فيه همومى، واللى بيجرى ف يومى
وف الآخر زى هدومى مسكته قطعته
قطعته رغم إنى عارف لو جالك ح تساعدنى
وممكن تاخد قرار وقتى يسعدنى
قلت أبعت وأشتكيلك هو أنا ليا حد غيرك
لكن أعمل إيه ف ضميرى لما يتعبنى
باشكيلك فيه يا ريس على حقى اللى ضاع
واللى اتغير فينا من غدر الطباع
واللى شفته ف شبابنا من حالات الضياع
خفت عليك يا ريس ليجيلك صداع
بصراحة خفت يا ريس أخش ف سين وجيم
يتهمونى بالجنون ويقولوا راجل لئيم
مع إنى بأحبك يا ريس وبأقسم بالعظيم
علشان كده يا ريس مسكته قطعته