أنا البرادعى يا حسنى

موضوع: أنا البرادعى يا حسنى 2010-03-05, 11:16 pm

وربما جاء يوم نجلس فيه معاً ... لا لكي نتفاخر ونتباهى .. ولكن لكي نتذكر وندرس ونُعلّم أولادنا وأحفادنا جيلاً بعد جيل ... قصة الكفاح ومشاقه ؛ مرارة الهزيمة وآلامها ؛ وحلاوة النصر وآماله .
وكنت نائما فى يوم تخيلت أن ليله دافئ فقررت أن أنام فى تلك الليلة بدون غطاء .. وكانت نتيجة ذلك أنى حلمت حلما أريد من يفسره لى
حلمت خير اللهم أجله خير إن البرادعى كلم حسنى فى التليفون وجاء الحوار التالى :!
ألو
سلام عليكم
وعليكم السلام .... مين بيتكلم
أنا البرادعى ياحسنى ... ممكن نتكلم
لا مش ممكن ....
ليه بس هو فيه ايه ..؟
هو فيه ايه ..... أنت مش عارف ولى ايه
عارف ايه .....
عارف ايه .... مش عارف انك عايز تترشح قدامى ...!!!
ودى فيها ايه ..!!!!
ودى فيها ايه ...... فيها كتيييييييييييييييير
أنا مش شايف فيها حاجه
أنا شايف فيها كتييييير
ممكن تقولى فيها أيه
فيها انك نسيت نفسك ... وصدقت أنك ممكن تقعد ع الكرسى
فيها أنك فاكر إن نوبل بتاعتك هاتخليك زيى وأحسن منى
فيها إنك عايش فى الوهم ومش عارف إن أنا حسنى
تسمح لى أقاطعك ...أنا مش شايف أى حاجه من الحاجات دى
أنا شايف أنها حرية رأى
هههههههههههههههههه حرية رأى ...أنت هنا فين .... أنت فاكر نفسك فى سيدنى
واللا تكونشى فاكر نفسك فى نيوجيرسى .... أنت هنا فى مصر ... لو مش عارفها ممكن أخلى واحد يعرفهالك كويس ... واحد كده من رجالة العادلى
أنت بتهددنى !!!؟؟
أنا مابهددش ... أنا بنفذ على طول ... من غير تهديد ولا تهويش
أوعى تكون فاكر نفسك موسوى بتاع ايران وأحنى فى طهران ... لو كنت فاكر نفسك موسوى أنا مش أحمدى نجاد يابرادعى
تعرف أيمن نور ونعمان جمعه .... روح أسألهم أيه اللى جرالهم
أنا عارف نفسى كويس
لما أنت عارف نفسك كويس ماتخليك فى حالك وتلعب على قدك .....لازم يعنى تترشح قدامى !!!
دى حريه .... وكل واحد حر يعمل ما بداله ... كل واحد حر فى أفكاره وأرائه ... وحر كمان فى قراراته
أسمع أنت هاتصدعلى دماغى ع الفاضى .. أنا هاعمل معاك أتفاق ع الماشى
أتفاق ايه .... أنا مش بتاع أتفاقات !!
أسمع بس وما تقاطعنيش
أتفضل قول .... بس تقول كلام موزون
وأنا من أمتى بقول كلام مش موزون ....مره تانيه بحذرك ماتغلطش
أتفضل قول
أيه رأيك فى متين فدان فى توشكى وجنبهم قصر كده إنما جنان
أيه ده .... أنت بترشينى
اسمع بس وماتعملش فيها محمود المليجى .... طب ايه رأيك فى خمسين فدان فى سيناء وفندق صغير فى الشرم
مره تانيه بتحاول ترشينى
أنت باين عليك هاتغلبنى .... طب ايه رأيك تبقى سفيرنا فى لندن
لا طبعا
لأ ليه
لأنى انا عمرى ما قبلت رشاوى
أنت هاتعملى فيها أدهم الشرقاوى ..... روق كده وفكر فى الموضوع أنت ماتعرفش أنا ممكن اعمل فيك ايه
هاتعمل أيه .... هو أنا أصلا عملت فيك حاجه عشان تعمل فيا ..... وتعمل فى حاجه ليه ..!!
كل ده وما عملتش حاجه .... مش كفايه الشوشره اللى عملتهالى ... وخليت الناس كلها تتكلم ... مين أحسن البرادعى ولى حسنى !!
ودى فيها ايه ..!!
تانى بتقول ليا دى فيها ايه
أيوه دى فيها ايه ... واحد بيقول رأيه فى بلده ...وعايز يترشح فى الانتخابات ... هو الكلام ده غير قانونى
أنت هاتدخلنى فى موضوع قانونى ومش قانونى.... يابرادعى مانتش قدى ... هاجبلك هاجبلك فتحى سرور ... التزى بتاعى.... وأنت عارف أن اى حاجه بيخليها قانونى ومش قانونى حسب مزاجى ....بس هو مستنى منى الاشاره
ودى برضو تبقى شطاره
ماشى ياعم الفير ....أسمع عشان أنا مشغول وورايا أجتماعات كتير....من الآخر أنت عاوز ايه ..!!!.....عاوز فلوس .... عاوز أراضى ..... عاوز منصب كويس ....عاوز شهره وإعلام وتبقى ستار ...أى حاجه من دول قولهالى وأعملهالك طوالى
أنا مش عاوز حاجه من دول
أمال عاوز ايه
عاوز مصر تبقى مصر
أنت هاتجننى أمال مصر دلوقتى ايه ..!!؟
مصر دلوقتى مش مصر .... مصر خلاص صارت قزم وسط عمالقة ... عمالقة فى كل حاجه ... فى العلم والتكنولوجيا ... فى الاقتصاد والجيولوجيا .... فى الثقافة والفنون ....والأدب والعماره ...وفى الصناعة والزراعة والتجارة .... حتى السياحه دول كتير سبقتنا فى كل أنواع الحضاره
بس أحنا عمالقه فى الكوره ..... أنت نسيت ولى ع الماتشات مابتتفرجش
وهى الكوره برضو هاتحلنا مشاكل الصحه وطوابير العيش ....
ولى هاتحلنا مشاكل التعليم وأزمات الأنابيب والفول والعدس ....
ولى هاتخلى الدخل القومى كل سنه بيزيد ويزيد ....
ولى هاتحارب بيها الفساد اللى بقى فى كل شبر فيكى يامصر ....
ولى هاتقضى بالكوره على البطالة والاميه ....
الكوره دى لعبه لعبتها أنت ....
أيوه لعبه لعبتها انت عشان تنسى الناس همومها ومشاكلها اللى كل يوم عن يوم عماله تزيد ...
وأنت اللى هاتصلح ده كله
أنا مش سوبرمان ولا طرزان .... أنا مجرد راجل بيحب مصر وباعرض وجهة نظرى
يعنى انا اللى مابحبش مصر
ماحدش قال أنك مابتحبش مصر
أمال ايه
كل واحد له قدرات وأمكانيات وكمان له فكر ورأى ووجهة نظر ....
مش معنى أنى باعرضك أنى بلف حبل المشنقة حوالين رقبتك ...
أنا باعرضك لأن لى أراء مش زى أرائك ...
ولى وجهة نظر غير وجهة نظرك ....
عكسك أنت اللى بيعارضك بتتهمه بمحاولة قلب نظام الحكم ...
وتوديه السجن وترميه زى الكلب فى زنزانه يادوب متر فى متر ....
تنكر انك رميت فى السجن رجالة من خيرة رجال مصر ....
ليه مانتعاونش كلنا عشان خاطر تراب مصر .....
ليه بتفكر فى مصلحتك أنت وبتنسى مصلحة البلد اللى أسمها مصر .....
ليه بتفكر فى اولادك أنت وبتنسى أولاد الشعب ....
لازم تسمح لكل واحد إنه يعبر عن وجهة نظره حتى لو كانت ضدك ....
أنت مش مصر وأنا مش مصر ...
أنت مصرى وانا مصرى ومصر أكبر منى ومنك ....
ياريت تسمع وجهة نظرى ....
لازم تسيب الناس تعبر عن أرائها وأفكارها ....
الناس دى كلهم بيحبوا مصر يمكن كمان أكتر منى ومنك ....
ياحسنى غلط انك تتصور أن الناس كلها ضدك أو بتحاربك ....
الناس دى قلبها على مصر وعايزاها تبقى أحسن بلد فى الدنيا .....
نصيحه ياريت تسمعها منى وتطمن ..
أنا مش طمعان فى فلوس وأراضى أو حتى شهره وكلام ع الفاضى ....
أنا حتى كمان مش طمعان فى الكرسى ...
أنا عايزك تعرف إن مش كل اللى يعبر عن رأيه أو كل اللى يقول رأى يخالف رأيك ...
ده مش وطنى .. الناس دول وطنيين وبيعشقوا تراب مصر
عشق حقيقى مش تمثيل
دى فرصتك .... أتنازل عن الكرسى
مش ليا طبعا .. أنا مش طمعان فيه من أصله
أتنازل عن الكرسى للشعب وخلى البلد فيها ديمقراطية وحريه
ساعتها الشعب هايحطك فى عينه وهايفتكرك طول العمر
ويمكن كمان يعملك تمثال ويسميه تمثال الحريه
مش لأنك كنت رئيس جمهوريه
لا لأنك ساعتها هاتكون أول واحد يفتح باب من أبواب الحريه بجد .. فى بلد أسمها جمهورية مصر العربيه
خلصت كلامك يابرادعى
أيوه ياحسنى
أقولك حاجه ولا تزعلش
أتفضل قول
كلامك كله مايسواش عندى بربع جنيه فجل أو خس .... وفر كلامك اللى انت دوشت دماغى بيه
وفره عشات تقوله فى محاضره فى أوكسفورد ولى كامبريدج
أنا واخد قرارى من زمااااان .... وهافضل فى الحكم لحد ماموت وينتهى عمرى
وأتطمن .... أبنى هو اللى هايمسك من بعدى
عارف يا حسنى .... البلد دى مافيش منها فايده طول مانت ماسك فى الحكم ومكلبش فى الكرسى
المكالمه أنتهت يابرادعى
المكالمه أنتهت ياحسنى ... بس معركة الحريه لسه بدرى عليها كتيييير ....!!!

موضوع: رد: أنا البرادعى يا حسنى 2010-03-19, 10:36 pm

فين الناس من كل ده